O‘zbekiston Respublikasi Fanlar akademiyasi Botanika institutida “GBIF Central Asia 2026 Subregional Engagement Meeting” mavzusidagi xalqaro konferensiya o‘z faoliyatini boshladi. Mazkur anjuman Markaziy Osiyo mintaqasida biologik xilma-xillik bo‘yicha ma’lumotlar almashinuvi, ularni raqamlashtirish va global axborot tizimlariga integratsiya qilish masalalariga bag‘ishlangan.

Konferensiya doirasida hududiy va xalqaro miqyosdagi yetakchi olimlar, mutaxassislar hamda ilmiy tashkilotlar vakillari ishtirok etib, bioxilma-xillikni o‘rganish, saqlash va barqaror boshqarish yo‘nalishlarida olib borilayotgan tadqiqotlar natijalari muhokama qilinadi.
Konferensiyani O‘zbekiston Respublikasi Fanlar akademiyasi vitse-prezidenti Sh.O‘. Turdiqulova kirish so‘zi bilan ochib berdi. U o‘z nutqida konferensiya ishtirokchilarini samimiy tabriklab, anjuman ishiga muvaffaqiyat tiladi hamda mazkur tadbirning mintaqada biologik xilma-xillikni o‘rganish va xalqaro ilmiy hamkorlikni rivojlantirishdagi ahamiyatini alohida ta’kidladi.

Tadbirda Markaziy Osiyo va Yevropa davlatlaridan tashrif buyurgan ko‘plab xorijiy mehmonlar, yetakchi olimlar va mutaxassislar ishtirok etmoqda, bu esa anjumanning xalqaro miqyosdagi ahamiyati va ilmiy hamkorlikni rivojlantirishdagi o‘rnini yanada oshirmoqda.

Shundan so‘ng O‘zbekiston Respublikasi Fanlar akademiyasi Botanika instituti direktori, akademik K. Sh. Tojiboyev tadbir ishtirokchilari va barcha mehmonlarga Botanika instituti va GBIF bilan xamkorlikda olib borilayotgan ishlar yuzasidan ma’lumot berdi.

konferensiya bugungi kun tartibidagi maruzalar bilan o‘z ishini davom ettirmoqda

Eslatib o‘tamiz konferensiya 25 aprelga qadar davom etadi.

